نوان صوبا ٺاهڻ تي سياسي اڳواڻن ۾ اختلاف، اتفاقِ راءِ، اختيارن جي منتقلي ۽ مڪاني حڪومتن کي مضبوط ڪرڻ تي زور

اسلام آباد (ويب ڊيسڪ) پاڪستان ۾ انتظامي جوڙجڪ جي نئين سر ترتيب ۽ نوان صوبا ٺاهڻ واري تڪراري مطالبي تي بحث دوران دوران حڪومتي ۽ مخالف ڌر جي اڳواڻن، سياسي اڳواڻن ۽ ماهرن مختلف موقف پيش ڪندي اختيارن جي منتقلي، مقامي حڪومتن جي مضبوطي ۽ وسيلن جي منصفاڻي ورڇ تي زور ڏنو.
بلوچستان جي وڏي وزير سرفراز بگٽي چيو ته بلوچستان ۾ نون صوبن جي ضرورت آهي، پر نوان انتظامي يونٽ قائم ڪرڻ لاءِ اتفاقِ راءِ ضروري آهي.
هن ٻڌايو ته بلوچستان ۾ ڊويزنن جو انگ 8 مان وڌائي 12 ڪيو ويو آهي.
اڳوڻي وزيراعظم شاهد خاقان عباسي چيو ته نون صوبن بابت سوچي سمجهي فيصلو ڪرڻ گهرجي، هن صلاح ڏني ته ڊويزنن جي سطح تي نوان انتظامي يونٽ قائم ڪيا وڃن ۽ پوليس کي به مقامي سطح تي منظم ڪيو وڃي.
اڳوڻي وفاقي وزير اسد عمر چيو ته نوان صوبا ٺاهڻ ۾ ڪو حرج ناهي ۽ آئين ۾ ان جو طريقيڪار موجود آهي.
سندس چوڻ هو ته ملڪ جو اصل مسئلو رڳو اختيارن جي منتقلي نه، پر انتظامي نظام کي جديد ضرورتن مطابق بڻائڻ به آهي.
مسلم ليگ (ن) جي اڳواڻ خرم دستگير چيو ته نوان صوبا ٺاهڻ کان اڳ آباديءَ تي ضابطو آڻڻ ۽ نئين انتظامي ڍانچي لاءِ ضروري بنياد تيار ڪرڻ گهرجن.
بحث دوران عمر چيمه چيو ته سنڌ اڳ ون يونٽ جي مخالفت ڪئي هئي ۽ هاڻي نون صوبن جي قيام جي به مخالفت ڪري رهيو آهي. سندس چوڻ هو ته اسيمبليءَ ۾ ٺهراءُ ڪري اهو چئي نٿو سگهجي ته نون صوبن بابت ڳالهائي به نه ٿا سگهو.
جماعت اسلامي جي اڳواڻ لياقت بلوچ چيو ته جيستائين طاقتور طبقو پاڻ کي آئين جو پابند نه بڻائيندو، تيستائين ڪو به نظام ڪامياب نه ٿي سگهندو.
ايم ڪيو ايم جي ايم اين اي آسيا اسحاق چيو ته 26هين ۽ 27هين آئيني ترميم دوران پيپلز پارٽي مڪاني ادارن بابت آئيني ترميمي بل شامل ٿيڻ نه ڏنو هو.
سندس چوڻ هو ته ان وقت ايم ڪيو ايم اعلان ڪيو هو ته جڏهن به نون صوبن جي قيام جي ڳالهه ٿيندي ته سندن جماعت اڳڀري هوندي.
دانيال عزيز چيو ته صوبن کي ڪمزور ڪيو ويو آهي ۽ ڪو 12 ته ڪو وري 32 يا 36 صوبا ٺاهڻ جي ڳالهه ڪري رهيو آهي، ڄڻ صوبا تارازيءَ ۾ توري ٺاهڻا هجن. هن چيو ته جتي سياسي اتفاقِ راءِ موجود آهي، اتي پهرين عمل ڪرڻ گهرجي.
نديم افضل چن چيو ته نون صوبن جي ڳالهه ڪندي ملڪ ٽوڙڻ طرف نه وڃڻ گهرجي، پر پرويز مشرف جي دور جهڙو مڪاني حڪومتن جو نظام آڻڻ تي اتفاق ڪرڻ گهرجي.