سيڪريٽري اوقاف، زڪوات عشر ۽ مذهبي امور کاتي جي سيڪريٽري جو ڊاڪٽر زينت عيساڻي انسٽيٽيوٽ آف ميڊيڪل سائنسز (ٽونٽي بيڊ هاسپيٽل شڪارپور) جو دورو

شڪارپور (رپورٽ: مومن علي مهر)
سيڪريٽري اوقاف، زڪوات عشر ۽ مذهبي امور کاتي جي سيڪريٽري جو ڊاڪٽر زينت عيساڻي انسٽيٽيوٽ آف ميڊيڪل سائنسز (ٽونٽي بيڊ هاسپيٽل شڪارپور) جو دورو.
سيڪريٽري اوقاف آغا فاخر حسين جو شڪارپور جي قديم درگاهن ۽ تاريخي مسجدن جو تفصيلي دورو، زبون حال عمارتن جي فوري مرمت ۽ قبضا ختم ڪرائڻ جو حڪم تفصيل موجب سيڪريٽري اوقاف، زڪوات عشر ۽ مذهبي امور کاتي جي سيڪريٽري آغا فاخر حسين جو ڊاڪٽر زينت عيساڻي انسٽيٽيوٽ آف ميڊيڪل سائنسز (ٽونٽي بيڊ هاسپيٽل شڪارپور جو دورو ڪيو. ان موقعي تي چيئرمين لوڪل زڪوات عشر ڪاميٽي شڪارپور عمران ناپر، عبدالحفيظ منگي، ڊسٽرڪٽ مئنيجر اوقاف وقف پراپرٽي سکر اعجاز احمد چنه ۽ اطلاعات کاتي جو نمائندو عبدالغفار ساڻس گڏ هئا. ان موقعي تي ايڊمنسٽريٽر/ميڊيڪل سپرينٽينڊنٽ ڊاڪٽر نجيب احمد شاهه بخاري سيڪريٽري آغا فاخر حسين کي اين آءِ سي يو، آءِ سي يو، ايمرجنسي، ايم آر آءِ، سٽي اسڪين، ايڪسري، الٽراسائونڊ، ميموگرافي وارڊن جو تفصيلي دورو ڪرايو. سيڪريٽري اوقاف، زڪوات، عشر ۽ مذهبي امور آغا فاخر حسين شڪارپور جي درگاهه سيد حاجي عبداللطيف شاهه جيلاني، 400 سالا قديمي جيلاني مسجد ۽ شاهي جامع مسجد لکيدر جو تفصيلي دورو ڪيو. ان موقعي تي ساڻس اڳوڻو صوبائي وزير اوقاف ۽ همايون شريف جو گادي نشين پير ميان عبدالباقي، مفتي شفيق احمد قادري، ڊسٽرڪٽ خطيب اوقاف علامه حبيب احمد قادري، جامع مسجد لکيدر جي خطيب مفتي محمد صديق قادري ۽ مولانا مسعود احمد قادري پڻ گڏ هئا. دوري دوران سيڪريٽري آغا فاخر حسين درگاهه سيد حاجي عبداللطيف شاهه جيلاني تي چادر چاڙهي ۽ دعا گهري. ان کان پوءِ هن درگاهه ۽ قديمي مسجد جو تفصيلي معائنو ڪيو، جتي عمارتن جي زبون حال حالت، ڇتين، ڀتين ۽ ڇت جي شهتيرن کي نقصان پهچڻ تي ڳڻتي جو اظهار ڪيو. ان موقعي تي آغا فاخر حسين چيو ته درگاهه ۽ 400 سالا قديمي جيلاني مسجد جي حالت انتهائي خراب آهي. عمارتن جون ڇتيون، ڀتيون ۽ شهتير ايتري قدر متاثر ٿي چڪا آهن، جو انهن کي ٽيڪا ڏئي سهارو ڏنو ويو آهي. هن چيو ته هي انتهائي نازڪ معاملو آهي، تنهنڪري ضروري ڪاغذي ڪارروائي مڪمل ڪري تعمير ۽ مرمت جو ڪم بنا دير شروع ڪرايو وڃي، جيئن تاريخي عمارتن کي وڌيڪ نقصان کان بچائي سگهجي. ان کان پوءِ سيڪريٽري اوقاف شڪارپور جي مشهور شاهي جامع مسجد لکيدر جو دورو ڪيو. هن مسجد جي خطرناڪ حد تائين زبون حال حالت تي ڳڻتي ظاهر ڪندي لاڳاپيل اختيارين کي هدايت ڪئي ته ضروري ڪاغذي ڪارروائي جلد مڪمل ڪري تعمير ۽ مرمت جو ڪم فوري طور شروع ڪرايو وڃي. آغا فاخر حسين چيو ته شاهي جامع مسجد لکيدر شڪارپور جي تاريخي سڃاڻپ ۽ مذهبي ورثي جو اهم حصو آهي، جتي شهر جا رهواسي ۽ ٻاهران ايندڙ زائرين ۽ مسافر نماز ادا ڪرڻ لاءِ حاضر ٿيندا آهن. تنهنڪري مسجد جي حفاظت ۽ بحاليءَ کي اوليت ڏني وڃي ۽ ان جي تعمير جو ڪم جلد کان جلد شروع ڪيو وڃي. سيڪريٽري آغا فاخر حسين وڌيڪ چيو ته درگاهه سيد حاجي عبداللطيف شاهه جيلاني ۽ درگاهه آمين الدين شاهه چشتي جي ملڪيتن تي ٿيل قبضا فوري طور ختم ڪرايا ويندا ۽ لاڳاپيل ملڪيتون واپس درگاهن ۽ مسجدن جي حوالي ڪيون وينديون، جيئن انهن جي اصل مقصد تحت حفاظت ۽ استعمال کي يقيني بڻائي سگهجي. دوري جو مقصد تاريخي ۽ مذهبي ورثي جي موجوده صورتحال جو جائزو وٺڻ، زبون حال عمارتن جي بحاليءَ لاءِ عملي قدم کڻڻ ۽ درگاهن جي ملڪيتن کي قبضي کان آجو ڪرائڻ هو.