پبلڪ اسڪول حيدرآباد ۾ سالياني ايوارڊ سرمني شاندار نموني سان منعقد

پبلڪ اسڪول حيدرآباد ۾ اڪيڊمڪ سال 2024–2025ع لاءِ سالياني ايوارڊ سرمني نهايت ئي شاندار، منظم، باوقار ۽ يادگار نموني سان منعقد ڪئي وئي، جنهن ۾ علم، ادب، ثقافت ۽ نظم و ضبط جو حسين سنگم ڏسڻ ۾ آيو. تقريب اسڪول جي وسيع ۽ سجايل هال ۾ منعقد ٿي، جتي شاگردن، استادن، والدين ۽ معزز مهمانن وڏي انگ ۾ شرڪت ڪري محفل کي چار چنڊ لڳائي ڇڏيا.
تقريب جا معزز مهمان خاص محترم حنيف شريف صاحب (ڊائريڪٽر آف آغا خان يونيورسٽي امتحان بورڊ)، محترم نواب ظفر صاحب (ڊپٽي ڊائريڪٽر سنڌ ايجوڪيشن فائونڊيشن) ۽ محترم اقبال ميمڻ صاحب (پرنسپال پبلڪ اسڪول حيدرآباد) هئا، جن پنهنجي موجودگي سان تقريب جي وقار ۾ اضافو ڪيو. ان موقعي تي ميمبرس آف بي او جي، محترمه رمشا ٽالپر ۽ محترم همايون خان پڻ موجود هئا، جن جي شرڪت محفل جي سونهن بڻجي وئي.
تقريب ۾ پبلڪ اسڪول حيدرآباد جي وائيس پرنسپالن محترم فضل الدين ميمڻ ۽ محترم پير محمد جوڻيجو، ڊائريڪٽر آف اسٽڊيز محترم اشوڪ ڪمار، اسڪول جا سينيئر ۽ جونيئر استاد، شاگرد، شاگردياڻيون ۽ انعام ماڻيندڙ شاگردن جا والدين ڀرپور نموني سان شرڪت ڪئي.
پروگرام جي شروعات قرآن مجيد جي پاڪ تلاوت سان ٿي، جنهن بعد عقيدت ۽ محبت سان ڀرپور نعت رسول ﷺ پيش ڪئي وئي. ان کان پوءِ اسڪول جي پرنسپال محترم اقبال ميمڻ صاحب ۽ ميڊم ڪهڪشان پاران معزز مهمانن ۽ شرڪت ڪندڙن کي دل جي گهراين سان ڀليڪار ڪيو ويو. محترم اقبال ميمڻ تقريب ۾ ڳالهائيندي شاگردن جي صلاحيتن، استادن جي محنت ۽ والدين جي ساٿ ۽ سهڪار کي پڻ ساراهيو.
تقريب جي ڪاروائي شاگردن ۽ شاگردياڻين وڏي اعتماد، سٺي لهجي ۽ ڀرپور مهارت سان گڏيل طور تي هلائي، جنهن سامعين کان خوب داد حاصل ڪيو.
تقريب دوران شاگردن طرفان خوبصورت ٽيبلوز، دل موهيندڙ گيت، ثقافتي رنگن سان سينگاريل ڊانس ۽ مختلف فني آئيٽمز پيش ڪيا ويا، جيڪي سامعين لاءِ اکين ۽ دلين کي وڻندڙ منظر بڻجي ويا. ان بعد اڪيڊمڪ ۽ غير اڪيڊمڪ شعبن ۾ شاندار ڪارڪردگي ڏيکاريندڙ شاگردن ک سرٽيفڪيٽ، شيلڊون، ليپ ٽاپ ۽ ٻيا قيمتي انعام ڏنا ويا، جنهن سان شاگردن ۾ وڌيڪ محنت، لگن ۽ همت جو جذبو پيدا ٿيو. ان سان گڏ محنتي ۽ قابل استادن کي پڻ سندن خدمتن جي اعتراف طور سرٽيفڪيٽ پيش ڪيا ويا، جڏهن ته اسڪول جي ٽيڪنيڪل اسٽاف کي به نظرانداز نه ڪيو ويو ۽ کين پڻ انعامن سان نوازيو ويو.
سڄي تقريب نظم و ضبط، جوش، جذبي ۽ سٺي ترتيب سان ڀرپور رهي. پروگرام جي ڪامياب انعقاد ۾ انتظامي ميمبرن محترم صهيب سيال، محترمه قدسيا ۽ محترمه ڪهڪسان جي محنت، لگن ۽ ڀرپور ڪوششن کي خاص طور ساراهيو ويو، جن پنهنجي ذميوارين کي نهايت خوش اسلوبي سان نڀايو.
آخر ۾ تقريب ڀرپور چمڪ، دمڪ، رنگ ۽ ڍنگ سان پنهنجي پڄاڻي تي پهتي، جنهن بعد سڀني شرڪت ڪندڙن لاءِ رات جي ماني جو به شاندار انتظام ڪيو ويو. سالياني ايوارڊ سرمني شرڪت ڪندڙن جي دلين ۾ هڪ خوشگوار ۽ يادگار تاثر ڇڏي وئي ۽ اها تقريب پبلڪ اسڪول حيدرآباد جي تعليمي، تربيتي ۽ ثقافتي ڪاميابين جو روشن مثال بڻجي سامهون آئي.