اسلام آباد: ترجمان دفتر خارجہ چيو آهي ته پاڪستان آمريڪي اميگرنٽ ويزا جي پروسيسنگ بابت آمريڪي اختيارين سان رابطي ۾ آهي ۽ اميد آهي ته اميگرنٽ ويزا جي معمولي آن لائين پروسيسنگ جلد بحال ٿي ويندي۔
اسلام آباد ۾ هفتيوار بريفنگ ڏيندي ترجمان دفتر خارجہ چيو ته پاڪستان ايران جي صورتحال بابت ٿيندڙ اڳڀرائي تي گهري نظر رکيو ويٺل آهي۔ پاڪستان صورتحال جي پرامن حل لاءِ هر ڪوشش جي حمايت ڪري ٿو ۽ اميد رکي ٿو ته ايران ۾ امن ۽ استحڪام قائم رهندو۔
پاڪستان صورتحال جي پرامن حل لاءِ سڀني ڪوششن جي حمايت ڪري ٿو: ترجمان
طاهر اندرابي چيو ته ايران پاڪستان جو پاڙيسري ملڪ ۽ عالمي برادري جو اهم رڪن آهي، تنهنڪري پاڪستان ايران کي دوست ۽ ڀائر ملڪ طور پرامن ۽ خوشحال ڏسڻ چاهي ٿو۔ پاڪستان ۽ ايران جي عوام وچ ۾ گهرا تاريخي، ثقافتي ۽ مذهبي لاڳاپا آهن۔ پرامن ۽ مستحڪم ايران پاڪستان جي مفاد ۾ آهي۔
ترجمان موجب ايران ۾ تازا احتجاج عام شهرين کي پيش ايندڙ معاشي مشڪلاتن سبب سامهون آيا آهن، پر اميد آهي ته ايراني حڪومت طرفان اعلان ڪيل معاشي امدادي قدم عوام جون مشڪلاتون گهٽائيندا۔ ايران هڪ مضبوط ۽ باحوصلہ قوم آهي جنهن ماضي ۾ ڪيترن ئي چيلينجز کي منهن ڏنو آهي، تنهنڪري پاڪستان کي ايراني عوام ۽ قيادت جي دانائي تي مڪمل اعتماد آهي ۽ يقين آهي ته ايراني قوم انهن چيلينجز تي قابو پائي وڌيڪ مضبوط بڻجي اڀرندي۔
ايران ۾ پاڪستاني شهرين جي مدد لاءِ تهران ۾ پاڪستاني سفارتخانو سرگرم آهي: ترجمان دفتر خارجہ
ترجمان دفتر خارجہ وڌيڪ چيو ته پاڪستان ايران بابت جاري ٽريول ايڊوائزري کي ٻيهر ورجايو آهي، جنهن موجب پاڪستاني شهري ايران جي سفر دوران انتهائي احتياط ۽ حفاظتي تدبيرون اختيار ڪن۔ ايران ۾ موجود پاڪستاني شهرين جي مدد لاءِ تهران ۾ پاڪستاني سفارتخانو مڪمل طور سرگرم آهي، جڏهن ته پاڪستاني سفير ۽ سندن ٽيم شهرين جي سلامتي لاءِ ڀرپور ڪردار ادا ڪري رهي آهي۔
آمريڪي اميگرنٽ ويزا جي معمولي آن لائين پروسيسنگ جلد بحال ٿيندي: ترجمان
اميگرنٽ ويزا جي معطلي بابت ترجمان چيو ته پاڪستان آمريڪي اميگرنٽ ويزا جي پروسيسنگ متعلق آمريڪي اختيارين سان رابطي ۾ آهي۔ اميگرنٽ ويزا جي معمولي آن لائين پروسيسنگ جلد بحال ٿي ويندي۔ پاڪستان جو موقف آهي ته اهو آمريڪي اميگريشن پاليسين جو هڪ اندروني جائزو عمل آهي۔
ڀارتي آرمي چيف جي الزامن جي سخت ترديد
ان کان علاوه ترجمان دفتر خارجہ ڀارتي آرمي چيف جي الزامن کي سختي سان رد ڪندي چيو ته ڀارت طرفان دهشتگردي بابت الزام سياسي مقصدن لاءِ گهڙيل ڪوڙيون ڪهاڻيون آهن۔ دهشتگردي خلاف پاڪستان جون قربانيون عالمي سطح تي تسليم ٿيل آهن۔ پاڪستان خلاف ڀارتي الزام خود ڀارت جي ساک کي نقصان پهچائي رهيا آهن۔
ترجمان وڌيڪ چيو ته افغانستان سميت خطي ۾ ڀارت جي حمايت يافته دهشتگرد نيٽ ورڪن جي نشاندهي ٿي چڪي آهي۔ ڀارت طرفان ماوراءِ عدالت قتل ۽ رياستي سرپرستي ۾ دهشتگردي جون مثالون رڪارڊ تي موجود آهن۔
ترجمان دفتر خارجہ جو چوڻ آهي ته پاڪستان ڀارت کي اشتعال انگيز بيانن کان پاسو ڪرڻ جو مشورو ڏنو آهي، جڏهن ته ڀارت ۾ وڌندڙ انتهاپسندي ۽ مذهبي بنيادن تي تشدد کي خطي لاءِ خطرو قرار ڏنو ويو آهي۔
