راولپنڊي: عدالت ۾ پيشي کانپوءِ واپسي دوران قيدي وين مان فرار ٿيل هڪ وڌيڪ قيدي کي پوليس گرفتار ڪري ورتو آهي.
راولپنڊي ۾ قيدي وين مان فرار ٿيل 14 حوالاتين جي گرفتاري بابت ڪارروائي ۾ وڌيڪ اڳڀرائي ٿي آهي، جتي پوليس هڪ انتهائي سنگين ڪيس ۾ گهربل فرار ٿيل قيدي کي گرفتار ڪيو آهي.
راولپنڊي پوليس جي ترجمان موجب گرفتار ٿيل جوابدار وهاب کي وڌيڪ قانوني ڪارروائي لاءِ اسلام آباد پوليس حوالي ڪيو ويو آهي.
ترجمان ٻڌايو ته قيدي وين مان فرار ٿيل 14 حوالاتين مان هيل تائين 8 ڄڻن کي ٻيهر گرفتار ڪيو ويو آهي، جڏهن ته باقي فرار ٿيل جوابدارن جي ڳولا جاري آهي.
واضح رهي ته 29 جون تي عدالت ۾ پيشي کانپوءِ قيدين کي اڊيالا جيل منتقل ڪيو پئي ويو ته چيڪنگ دوران قيدي وين کي روڪيو ويو. ان موقعي تي هڪ قيدي پوليس اهلڪارن جي اکين ۾ مرچون اڇلائي ڇڏيون، جنهن جي نتيجي ۾ 14 قيدي فرار ٿيڻ ۾ ڪامياب ٿي ويا هئا.
واقعي کانپوءِ ڪجهه فرار ٿيل قيدين کي ٻيهر گرفتار ڪيو ويو، جڏهن ته پوليس اختيارين ڊيوٽي تي مقرر اڊيالا جيل جي گارڊ انچارج سميت پنج اهلڪارن کي به جاچ لاءِ حراست ۾ ورتو هو.
