سکر عوام جي جان ۽ مال جو تحفظ يقيني بڻايو وڃي: مولانا محمد صالح انڌڙ تفصيل مطابق، جمعيت علما اسلام صوبو سنڌ جي قائم مقام سيڪريٽري جنرل ۽ ضلع سکر جي امير مولانا محمد صالح انڌڙ چيو آهي ته سنڌ حڪومت امن ۽ امان قائم ڪرڻ جي نالي تي اربين روپيا خرچ ڪرڻ جي باوجود عوام جي جان ۽ مال جي تحفظ ۾ مڪمل طور ناڪام ٿي چڪي آهي. اڄ عام شهرين سڙڪن، بازارن، شاهراهه ۽ تفريحي هنڌن تي به پاڻ کي غير محفوظ محسوس ڪري رهيا آهن، جيڪو حڪومت جي نااهلي جو واضح ثبوت آهي.
اهي ڳالهيون هنن تحريڪ “امن بحال ڪريو” جي تحت بچل شاه مياني، سکر ۾ منعقد احتجاجي مظاهري دوران خطاب ڪندي ڪيون.
مولانا محمد صالح انڌڙ چيو ته وڌندڙ بدامني، ڏوهاري گروهن پاران اغوا براءِ تاوان ۽ جرائم پيشه عناصر جي سرڪشي عوام ۾ شديد بيچيني ۽ خوف جو سبب بڻجي رهي آهي، جڏهن ته قانون نافذ ڪندڙ ادارا مؤثر ڪردار ادا ڪرڻ ۾ ناڪام نظر اچي رهيا آهن.
هنن مطالبو ڪيو ته حڪومت فوري طور تي امن ۽ امان جي صورتحال کي بهتر بڻائڻ لاءِ سنجيده قدم کڻي ۽ عوام کي تحفظ جو احساس ڏي، بصورت ٻئي عوامي احتجاج جو دائرو وڌيڪ وڌايو ويندو.
احتجاجي مظاهري ۾ حافظ عبدالحميد مهر، مولانا عبدالڪريم جونيجو، قاري عبدالمنان سميجو، مولانا سراج احمد جمالي، سيد سعيد احمد شاهه، مولانا محمد شفيع اجن، مولانا محمود لاکهو، قاري حبيب الله لاشاري، مولانا محمد صديق کنڌر، مولانا صدام حسين سبزوئي سميت وڏي انگ ۾ جمعيت علما اسلام جا ڪارڪن ۽ شهرين شرڪت ڪئي.
مظاهرين هٿن ۾ “امن بحال ڪريو” جا پلے ڪارڊز بلند ڪري امن ۽ امان جي بحالي لاءِ نعره بازي ڪئي.
