گورنمينٽ اسلاميا آرٽس ڪاليج سکر ۾ ذوالفقار سولنگي جي پروفيسر ڊاڪٽر شفيق احمد رند سان ملاقات، ڪاليج ميگزين تحفي طور پيش

سکر(رپورٽ) گورنمينٽ اسلاميا آرٽس ڪاليج سکر ۾ چيف ايڊيٽر روزاني پاڪ سوچ اخبار سکر ذوالفقار سولنگي جي ڪاليج جي پرنسپل پروفيسر ڊاڪٽر شفيق احمد رند سان اهم ملاقات ٿي، جنهن دوران تعليمي، ادبي ۽ صحافتي معاملن تي خيالن جي ڏي وٺ ڪئي وئي۔ ان موقعي تي پروفيسر ڊاڪٽر شفيق احمد رند مهمان کي ڀليڪار ڪندي چيو ته تعليمي ادارا ۽ ميڊيا سماج جي سڌاري ۾ اهم ڪردار ادا ڪن ٿا، ۽ اهڙيون ملاقاتون علمي ۽ ادبي لاڳاپن کي وڌيڪ مضبوط ڪن ٿيون۔ هن وڌيڪ چيو ته ڪاليج ۾ شاگردن جي علمي صلاحيتن کي اجاگر ڪرڻ لاءِ مختلف سرگرميون جاري آهن، جن ۾ ادبي ميگزين پڻ اهم حيثيت رکي ٿو۔ ملاقات دوران پروفيسر ڊاڪٽر شفيق احمد رند، ذوالفقار سولنگي کي ڪاليج جو شايع ٿيل ميگزين بطور تحفو پيش ڪيو، جنهن کي مهمان وڏي خوشي سان قبول ڪيو ۽ ڪاليج جي علمي ڪوششن کي ساراهيو۔ ان موقعي تي ذوالفقار سولنگي چيو ته تعليم ۽ صحافت هڪٻئي جا ساٿي آهن، ۽ شاگردن جي صلاحيتن کي اجاگر ڪرڻ لاءِ ميڊيا جو ڪردار انتهائي اهم آهي۔ هن ڪاليج انتظاميا جي ڪوششن کي خراج تحسين پيش ڪندي اميد ظاهر ڪئي ته مستقبل ۾ به اهڙيون علمي ۽ ادبي سرگرميون جاري رهنديون۔ ملاقات خوشگوار ماحول ۾ پڄاڻي تي پهتي، جتي ٻنهي ڌرين پاران مستقبل ۾ گڏيل سهڪار وڌائڻ جي عزم جو اظهار پڻ ڪيو ويو۔