اسلام آباد: (اربع: 01 اپريل 2026ع) وزيراعظم شهباز شريف فنانس ڊويزن کي هدايت ڪئي آهي ته اهي پيٽرول ۽ ڊيزل تي لڳايل ليوي جي ڍانچي جي حوالي سان آءِ ايم ايف سان ڳالهيون ڪن ته جيئن ايران جنگ سبب عالمي سطح تي پيٽروليم شين جي وڌندڙ قيمتن جو بار عوام تي پوڻ کان روڪي سگهجي.
سرڪاري ذريعن موجب وزيراعظم اڱاري تي ناڻي واري وزارت کي هدايت ڪئي ته اهي اهو معاملو آءِ ايم ايف جي آڏو اٿارين ته جيئن پيٽروليم قيمتن ۾ ڪنهن امڪاني هيٺ مٿانهين کي موجوده ليوي جي ذريعي متوازن ڪري سگهجي. هن وقت حڪومت پيٽرول تي في ليٽر 100 ۽ ڊيزل تي في ليٽر 55 روپيه ليوي لڳائي رهي آهي. پيٽروليم شين تي اها ليوي آءِ ايم ايف جي شرط جو حصو آهي.
اهو قدم اهڙي وقت ۾ سامهون آيو آهي جڏهن حڪومت اڳ ئي ايندهن جي قيمتن کي مستحڪم رکڻ لاءِ 129 ارب روپين جي سبسڊي خرچ ڪري چڪي آهي. اختيارين موجب اهو رليف ترقياتي بجيٽ ۾ ڪٽوتي ۽ ٻئي مد ۾ بچت جي ذريعي فراهم ڪيو ويو جيڪو انهي ڳالهه جي نشاندهي ڪري ٿو ته حڪومت عوام کي عالمي تيل منڊي جي هيٺ مٿانهين جي مڪمل اثرن کان بچائڻ لاءِ پرعزم آهي.
هڪ سينئر سرڪاري عهديدار نالو ظاهر نه ڪرڻ جي شرط تي ٻڌايو ته ايران جنگ سبب عالمي تيل جي قيمتن ۾ نمايان اضافو ٿيو آهي جنهن سبب ملڪي پيٽروليم قيمتن تي دٻاءُ وڌي ويو آهي. وزيراعظم جي هدايت واضح آهي ته هر ممڪن قدم کنيو وڃي ته جيئن اهو جهٽڪو عوام لاءِ ايندهن جي قيمتن ۾ اضافي جو سبب نه بڻجي.
هن ٻڌايو ته فنانس ڊويزن کي هدايت ڏني وئي آهي ته اهي آءِ ايم ايف سان امڪاني ليوي جي جوڙجڪ بابت هڪ تفصيلي تجويز تي ڳالهيون ڪن. ذريعن موجب حڪومت اهڙي شپن جو جائزو وٺي رهي آهي جنهن جي ذريعي تيل جي عالمي قيمتن ۾ اضافي جو بار پاڪستاني عوام تي منتقل ٿيڻ کان روڪي سگهجي.
