اسلام آباد: قومي اسيمبلي جي ٻارن جي حقن بابت پارلياماني ڪاڪَس (PCCR) اسلام آباد جي پاڪستان انسٽيٽيوٽ آف ميڊيڪل سائنسز (PIMS) ۾ باهه لڳڻ سبب نون ڄاول ٻارڙن جي فوتگين تي سخت افسوس ۽ مذمت جو اظهار ڪندي واقعي جي شفاف، غيرجانبدار ۽ جامع جاچ جو مطالبو ڪيو آهي.
ڪاڪَس موجب جاچ ذريعي باهه لڳڻ جا اصل سبب معلوم ڪيا وڃن، اسپتال ۾ حفاظتي ۽ هنگامي انتظامن جو جائزو ورتو وڃي، ذميوارن جو تعين ڪيو وڃي ۽ فوت ٿيل ٻارڙن جي وارثن کي انصاف فراهم ڪيو وڃي.
ٻارن جي حقن بابت پارلياماني ڪاڪَس جي ڪنوينر ڊاڪٽر نڪهت شڪيل، ايم اين اي، متاثر خاندانن سان دلي تعزيت ۽ نون ڄاول ٻارڙن جي والدين سان يڪجهتي جو اظهار ڪيو.
ڪاڪَس زور ڀريو ته ڪنهن به قسم جي غفلت، ڪوتاهي يا انتظامي ناڪامي جيڪا هن سانحي جو سبب بڻي هجي، ان جي نشاندهي ڪري ذميوارن خلاف قانون موجب ڪارروائي ڪئي وڃي.
پارلياماني ڪاڪَس چيو ته اسپتالن ۾ نون ڄاول ۽ ٻين حساس ٻارن جي حفاظت رياستي ادارن جي بنيادي ذميواري آهي. مستقبل ۾ اهڙن واقعن کان بچڻ لاءِ حفاظتي معيارن تي سختي سان عمل، هنگامي صورتحال کي منهن ڏيڻ لاءِ بهتر انتظام ۽ ادارن ۾ جوابدهي کي يقيني بڻائڻ ضروري آهي.
