سنڌ حڪومت کان سبجيڪٽ اسپيشلسٽ انٽرنيز (SSI) جي بحالي جو مطالبو

سنڌ حڪومت پاران تعليمي سال 2021-2022ع دوران سبجيڪٽ اسپيشلسٽ انٽرنيز (SSI) جون مقرريون ڪيون ويون هيون. ان مقصد لاءِ باقاعده سليڪشن ڪميٽيون جوڙيون ويون، جن تي لاڳاپيل ڊائريڪٽر ايجوڪيشن کي چيئرپرسن مقرر ڪيو ويو. مڪمل جاچ پڙتال، ميرٽ ۽ انٽرويوز کان پوءِ تقريباً 1200 سبجيڪٽ اسپيشلسٽ انٽرنيز کي سنڌ جي سرڪاري هائر سيڪنڊري اسڪولن ۾ مقرر ڪيو ويو.
اهي مقرريون ان وقت ڪيون ويون، جڏهن سنڌ پبلڪ سروس ڪميشن (SPSC) ذريعي ڀرتين تي پابندي هئي. سبجيڪٽ اسپيشلسٽ انٽرنيز مسلسل 28 مهينن تائين سنڌ جي سرڪاري هائر سيڪنڊري اسڪولن ۾ تدريسي خدمتون سرانجام ڏنيون ۽ شاگردن جي تعليم ۾ اهم ڪردار ادا ڪيو.
هن وقت تقريباً 250 متاثر سبجيڪٽ اسپيشلسٽ انٽرنيز گذريل ٻن سالن کان پنهنجي جائز حقن لاءِ مسلسل پرامن احتجاج ۽ جدوجهد ڪري رهيا آهن. اسان سنڌ حڪومت کان مطالبو ڪريون ٿا ته سرڪاري هائر سيڪنڊري اسڪولن ۾ موجود خالي جاين تي تجربيڪار سبجيڪٽ اسپيشلسٽ انٽرنيز کي فوري طور بحال ڪيو وڃي، جيئن هو ٻيهر پنهنجي تدريسي ذميواريون سرانجام ڏئي سگهن.
اها انتهائي افسوسناڪ ڳالهه آهي ته مالي سال 2024-25ع ۽ 2025-26ع جي بجيٽ ۾ سبجيڪٽ اسپيشلسٽ انٽرنيز لاءِ بجيٽ رکيل هجڻ باوجود کين بحال نه ڪيو ويو. بجيٽ رکڻ باوجود بحالي جو فيصلو نه ٿيڻ سبب متاثر انٽرنيز سخت بي يقيني ۽ مشڪلاتن کي منهن ڏئي رهيا آهن.
اسان وزيراعليٰ سنڌ ۽ تعليم واري وزير کي مؤدبانه اپيل ٿا ڪريون ته اسان جي جائز مطالبي جو فوري نوٽيس وٺي، گذريل ٻن سالن کان جاري پرامن جدوجهد کي نظر ۾ رکندي سبجيڪٽ اسپيشلسٽ انٽرنيز جي مسئلي جي حل لاءِ فوري طور هڪ بااختيار ڪميٽي جوڙي وڃي ۽ موجوده خالي جاين تي تجربيڪار سبجيڪٽ اسپيشلسٽ انٽرنيز جي بحالي لاءِ عملي قدم کنيا وڃن.
اسان جو مطالبو واضح آهي:
سرڪاري هائر سيڪنڊري اسڪولن ۾ موجود خالي جاين تي تجربيڪار سبجيڪٽ اسپيشلسٽ انٽرنيز (SSI) کي فوري طور بحال ڪيو وڃي.
اسان جو حق، اسان جي بحالي — SSI کي فوري بحال ڪيو وڃي!