شڪارپور ۾ آغا سراج خان دراني جي پهرين ورسي ملهائي وئي عوامي خدمتن تي ڀيٽا پيش

شڪارپور(رپورٽ مومن علي مهر)سنڌ اسيمبليءَ جي اڳوڻي اسپيڪر ۽ پاڪستان پيپلز پارٽيءَ جي سينيئر اڳواڻ مرحوم آغا سراج خان دراني جي پهرين ورسيءَ جي موقعي تي قرآن خواني ڪرائي وئي، جڏهن ته سندس عوامي، سياسي ۽ سماجي خدمتن کي ڀيٽا پيش ڪندي سرخ سلام پيش ڪيو ويو. ورسيءَ جي تقريب ۾ پاڪستان پيپلز پارٽيءَ جي اڳواڻن، عهديدارن، سياسي ۽ سماجي شخصيتن، جيالن ۽ شهرين وڏي انگ ۾ شرڪت ڪئي.تقريب کي خطاب ڪندي اڳواڻن چيو ته مرحوم آغا سراج خان دراني هڪ قدآور سياسي شخصيت، جمهوريت پسند اڳواڻ ۽ بهترين انسان هئا، جن پنهنجي سموري زندگي عوامي خدمت لاءِ وقف ڪري ڇڏي. هنن چيو ته آغا صاحب غريبن، مسڪينن ۽ بيروزگار نوجوانن جا همدرد هئا، جن هزارين نوجوانن کي روزگار جا موقعا فراهم ڪري ڪيترن ئي گهرن ۾ خوشحالي آڻڻ ۾ اهم ڪردار ادا ڪيو.
اڳواڻن جو چوڻ هو ته مرحوم آغا سراج خان دراني تعليم، صحت، ترقياتي ڪمن، عوامي ڀلائي ۽ امن امان جي بهتريءَ لاءِ اهم ڪوششون ڪيون. سندس سياسي جدوجهد، عوام سان محبت ۽ پارٽيءَ لاءِ ڪيل خدمتون هميشه ياد رکيون وينديون.
هنن وڌيڪ چيو ته آغا سراج خان دراني جي وفات سان سنڌ جي سياست ۾ هڪ وڏو خال پيدا ٿيو، جنهن کي ڀرڻ آسان ناهي. سندس عوامي خدمت جو جذبو ۽ جمهوري جدوجهد ايندڙ نسلن لاءِ مشعلِ راهه رهندي.مير عابد حسين خان ڀيو، امتياز احمد شيخ، چيف سردار جاڳڻ خان ڀيو، نعيم اڪبر قاضي، آغا مسيح الدين خان دراني، آغا شهباز خان دراني، آغا شجاع الدين خان دراني ۽ مير الطاف خان ڀيو (جونيئر) سميت ٻين اڳواڻن مرحوم آغا سراج خان دراني جي سياسي ۽ عوامي خدمتن کي ساراهيو ۽ چيو ته سندس عوام دوست ڪردار کي ڪڏهن به وساري نٿو سگهجي.آغا عبدالرحمان عرف ڏاڏو خان، غلام مصطفيٰ منگي، آغا جاويد دراني، عبدالحفيظ پيرزادو، آپا رخسانه مرکياڻي، برڪت علي لاشاري، ممتاز علي عرف پپو ڀيو ۽ عبدالوحيد مغل سميت ٻين شخصيتن پڻ مرحوم اڳواڻ کي خراجِ عقيدت پيش ڪيو.تقريب ۾ شريڪ اڳواڻن ۽ ڪارڪنن چيو ته آغا سراج خان دراني جون عوامي خدمتون ۽ جمهوريت لاءِ جدوجهد هميشه ياد رکيون وينديون، جڏهن ته سندس ڇڏيل سياسي ۽ سماجي ورثو عوام جي دلين ۾ زنده رهندو.تقريب جي پڄاڻيءَ تي مرحوم آغا سراج خان دراني جي مغفرت، درجات جي بلندي ۽ وارثن لاءِ صبر جميل جي دعا گهري وئي. ان موقعي تي سوين جيالن ۽ شهر واسين پڻ شرڪت ڪئي.