پنجاب اي آءِ جي دور ۾داخل ٿي رهيو آهي، خيبر پختونخوا پٿر جي دور ۾ آهي: مريم نواز

ساھيوال (ويب ڊيسڪ) پنجاب جي وزيراعليٰ مريم نواز چيو آهي ته اڄ پنجاب هٿرادو ڏاهپ واري ٽيڪنالوجي (اي آءِ) جي دور ۾ داخل ٿي رهيو آهي، جڏهن ته خيبرپختونخوا پٿر جي دور ۾ آهي.
ساھيوال ۾ شاگردن ۾ ليپ ٽاپ ورهائڻ واري تقريب کي خطاب ڪندي مريم نواز چيو ته جيڪي چوندا هئا ته هنن عوام کي شعور ڏنو، تن عوام جون زندگيون تباهه ڪري ڇڏيون، پي ٽي آءِ جي حڪومت ڪنهن ختم نه ڪئي، پر هنن پاڻ پنهنجي حڪومت ختم ڪئي.
هن چيو ته اهو پهريون لانگ مارچ هو، جيڪو پنهنجي ئي حڪومت ختم ٿيڻ تي پڄاڻيءَ تي پهتو. ڇا ڪڏهن ائين ڏٺو آهي ته هڪ صوبو ٻئي صوبي يا وفاق تي حملو ڪري؟
سندس چوڻ هو ته اهو پهريون لانگ مارچ هو، جنهن پنهنجي ئي حڪومت کي ختم ڪري ڇڏيو، هاڻي خيبرپختونخوا جي ماڻهن کي خبر پوندي ته ترقي ڇا کي چئبو آهي.
مريم نواز چيو ته هوءَ عوام جي خدمت جو جذبو کڻي گهران نڪتي آهي، جڏهن ته نواز شريف ملڪ ۾ موٽر ويز جو ڄار وڇايو آهي.
سندس چوڻ هو ته ڪراچيءَ مان ڪجهه آفيسر تازو پنجاب آيا، جن چيو ته صوبي جي سمورن کاتن ۾ عوام تي ڌيان ڏنو پيو وڃي.
هن چيو ٻين صوبن مان ايندڙ ماڻهو پنجاب جي ساراهه ڪن ٿا.
پنجاب جي وزيراعليٰ چيو ته صوبي ۾ 3 هزار اليڪٽرڪ بسون هلايون وينديون ۽ انهن جو ڀاڙو اڄ به 20 رپيا آهي.
هن ٻڌايو ته صوبي جي سمورن تعلقن ۾ اليڪٽرڪ بسون هلائڻ جو منصوبو آهي.
مريم نواز موجب، پنجاب ۾ شايد ئي ڪو اهڙو منصوبو هجي، جنهن ۾ نوجوانن کي شامل نه ڪيو ويو هجي. شاگردن کي ڏنيون ويندڙ اسڪوٽيون 3 هزار رپيا ماهوار قسط تي فراهم ڪيون پيون وڃن، جيئن ڪنهن تي مالي بار نه پوي.
مريم نواز چيو ته پنجاب ۾ مصنوعي ذهانت جون ليبارٽريون قائم ٿي رهيون آهن ۽ صوبي کي اي آءِ جي دور ۾ داخل ڪيو پيو وڃي، جڏهن ته سندس دعويٰ موجب خيبرپختونخوا اڃا پٿر جي دور ۾ آهي.
هن چيو ته جڏهن هوءَ وزيراعليٰ بڻي ته کيس خبر پئي ته 80 سيڪڙو يونيورسٽين ۾ وائيس چانسلر مقرر ٿيل ئي نه هئا، پر هاڻي هر يونيورسٽيءَ ۾ ميرٽ جي بنياد تي وائيس چانسلر مقرر ڪيو ويو آهي.
سندس چوڻ هو ته جيڪڏهن سندس پنهنجي گهر مان به ڪنهن جي سفارش اچي ته هوءَ قبول نه ڪندي، پنجاب ۾ حڪومت پاڻ عوام وٽ وڃي ٿي ۽ سندس مشن آهي ته صوبي جي هر شهريءَ کي سهولتون سندس دروازي تي فراهم ٿين.
هن وڌيڪ چيو ته پنجاب ۾ دوائون به ماڻهن جي گهرن جي دروازن تي پهچايون وڃن ٿيون.