نوڪرين ۽ ڪاروباري رابطن لاءِ مشهور آن لائين پليٽفارم لنڪڊ اِن اهڙيون نيون سهولتون متعارف ڪرائڻ جو اعلان ڪيو آهي، جن ذريعي واهپيدار پنهنجي مهارت ۽ تجربي کي ڪمائيءَ جو ذريعو بڻائي سگهندا.
نئين سهولت ’ايڊوائس سيشنز‘ ذريعي ماهر ۽ ڪاروباري ماڻهو معاوضي عيوض ٻين کي انفرادي صلاحون ڏئي سگهندا. ڪجهه واهپيدار پنهنجي خدمتن جي نوعيت ۽ مقرر ڪيل معاوضي موجب ڪلاڪ جا 100 ڊالر يا ان کان وڌيڪ به ڪمائي سگهن ٿا. شروعاتي طور اها سهولت آمريڪا ۾ بزنس پريميئم رڪنيت رکندڙن لاءِ هوندي. ڪمپني موجب، انهن صلاحڪاري گڏجاڻين مان حاصل ٿيندڙ ڪمائيءَ مان لنڪڊ اِن پنهنجو حصو نه وٺندو.
پليٽفارم تي اهڙيون سهولتون پڻ وڌايون وينديون، جن ذريعي ماڻهو پنهنجي هڪ کان وڌيڪ نوڪرين ۽ پيشور ذميوارين کي ڄاڻائي سگهندا. ان سان گڏ هڪ نئين خبرن واري وهڪري جي آزمائش ڪئي پئي وڃي، جنهن ۾ واهپيدارن کي انهن ماڻهن ۽ کاتن جون پوسٽون وڌيڪ نظر اينديون، جن سان سندن اڳ ئي رابطو آهي.
لنڪڊ اِن ڊجيٽل ڪاروباري ڪارڊ جي سهولت پڻ متعارف ڪرائيندو، جنهن کي موبائل فون جي والٽ ۾ محفوظ ڪري سگهجي ٿو. وڊيو ٺاهيندڙن لاءِ اشتهارن مان ڪمائيءَ ۾ حصيداريءَ واري رٿا وڌائڻ ۽ پوسٽن جي ڪارڪردگيءَ بابت ڄاڻ ڏيڻ لاءِ نئون تجزياتي تختو پڻ آندو ويندو.
ڪمپني موجب، گذريل هڪ سال دوران پنهنجي پروفائيل تي ’باني‘ يا ’فائونڊر‘ لکڻ وارن واهپيدارن جي انگ ۾ 70 سيڪڙو واڌ ٿي آهي. لنڪڊ اِن جي چيف پراڊڪٽ آفيسر هري سرينواسن جو چوڻ آهي ته هٿرادو ڏاهپ جي مدد سان ڊجيٽل شيون ٺاهڻ سولو ٿي ويو آهي، پر رڳو ڪا شيءِ تيار ڪرڻ سان ڪامياب ڪاروبار قائم نٿو ڪري سگهجي.
ڪمپني جو مقصد بدلجندڙ روزگار جي حالتن ۾ ماڻهن کي پنهنجي مهارت مان ڪمائڻ، آزاداڻي نموني ڪم ڪرڻ ۽ روايتي نوڪريءَ کانسواءِ آمدنيءَ جا ٻيا رستا ڳولڻ لاءِ وڌيڪ موقعا فراهم ڪرڻ آهي.
