ايف بي آر ڊسمبر ۾ رڪارڊ ٽيڪس گڏ ڪري ورتو

اسلام آباد: فيڊرل بورڊ آف ريونيو (ايف بي آر) گذريل مهيني ڊسمبر ۾ ڪنهن به سال جي ڊسمبر جي ڀيٽ ۾ سڀ کان وڌيڪ رڪارڊ ٽيڪس گڏ ڪري ورتو آهي۔

ايف بي آر جي عملدارن وفاقي وزير خزانه محمد اورنگزيب کي ٽيڪس ريونيو گڏ ٿيڻ بابت بريفنگ ڏيندي ٻڌايو ته ايف بي آر ڊسمبر مهيني دوران 1427 ارب 10 ڪروڙ رپيا ٽيڪس ريونيو گڏ ڪيو، جيڪو ماهوار هدف 1446 ارب رپين جو 99 سيڪڙو آهي۔

عملدارن موجب، هي ڪنهن به سال جي ڊسمبر ۾ هاڻي تائين سڀ کان وڌيڪ ٽيڪس وصولي آهي۔ اهڙيءَ طرح ان لينڊ ريونيو سروس شاندار ڪارڪردگي ڏيکاري، جنهن 1310 ارب رپين جي هدف جي مقابلي ۾ 1308 ارب رپيا وصول ڪيا، جيڪو 99.8 سيڪڙو بڻجي ٿو۔

ان کان علاوه، نومبر جي ڀيٽ ۾ ڊسمبر ۾ ٽيڪس وصولي ۾ 59 سيڪڙو واڌ ٿي آهي۔ نومبر ۾ ٽيڪس وصولي 898 ارب رپيا هئي، جيڪا ڊسمبر ۾ وڌي 1427.1 ارب رپيا ٿي وئي۔