سعودي سامونڊي حدن ۾هڪ ڪلاڪ اندر ٻئي آئل ٽينڪر تي راڪيٽ حملو

لنڊن (ويب ڊيسڪ) برطانوي ميري ٽائيم ٽريڊ آپريشنز اتر اوڀر سعودي عرب جي سامونڊي ڪناري ويجهو هڪ ٻئي آئل ٽينڪر تي حملي جي اطلاع ڏنو آهي.
تنظيم موجب، جهاز جي ڪپتان ٻڌايو ته الجبيل بندرگاهه کان لڳ ڀڳ 144 ڪلوميٽر پري هڪ ننڍڙي ٻيڙي ٽينڪر جي ويجهو آئي، جنهن تان ڪلهي تي رکي فائر ٿيندڙ راڪيٽ لانچر (آر پي جي) سان فائرنگ ڪئي وئي، حملي سبب جهاز جي کاٻي پاسي پوئين حصي کي نقصان پهتو.
ڪپتان موجب، حملو ڪندڙ فائرنگ ڪرڻ کانپوءِ اتان فرار ٿي ويا، جڏهن ته ٽينڪر پنهنجو سفر جاري رکيو آهي.
برطانوي ميري ٽائيم ٽريڊ آپريشنز جو چوڻ آهي ته واقعي ۾ عملي جو ڪو به ميمبر زخمي نه ٿيو.
اهو واقعو اهڙي وقت پيش آيو، جڏهن تنظيم ان کان لڳ ڀڳ هڪ ڪلاڪ اڳ ساڳئي علائقي ۾ هڪ ٻئي آئل ٽينڪر کي نشانو بڻائڻ جي اطلاع ڏنو هو.
ان رپورٽ موجب، الجبيل کان لڳ ڀڳ 126 ڪلوميٽر پري هڪ اڻڄاتل شيءِ ٽينڪر سان ٽڪرائي هئي، ان واقعي ۾ به ڪنهن جاني نقصان جي اطلاع ناهي مليو.